Toppmøte om hydrogen
Tysdag 17. november inviterte Statsminister Erna Solberg og olje- og energiminister Tina Bru til digitalt toppmøte om hydrogen.
I løpet av våren skal regjeringa legge fram ei melding til Stortinget om langsiktig verdiskaping frå norske energiressursar.
- Målet er å synleggjere det industrielle potensialet i norske energiressursar som grunnlag for framtidige lønnsame arbeidsplassar. I denne meldinga skal det blant anna bli lagt fram eit vegkart for hydrogen, sa Olje-og Energiminister Tina Bru.
Som ein del av kartleggingsarbeidet til vegkartet for hydrogen vart store aktørar på området invitert for å gje konkrete innspel til regjeringa. Følgande aktørar deltok på møtet: Equinor, Norled, Varanger Kraft, Elkem Bremanger, NEL, Nysnø, Reinertsen New Energy, Statkraft, Wilhelmsen og YARA.
Saka held fram under bildet.
Olje- og Energiminister Tina Bru
Høgt oppe på agendaen
Statsministeren Erna Solberg starta toppmøtet med å sei:
- Her er det mykje hydrogenekspertise rundt det digitale møtebordet. Regjeringa har hydrogen høgt oppe på agendaen. Ved hjelp av arbeidet med vegkartet kan det være med på å systematisere vidare satsing innanfor hydrogen og fornybar energi langs norskekysten.
Under møtet kom det fram mange konkrete innspel på moglegheiter og kva aktørane ser på som utfordringar i hydrogensatsinga.
Hydrogenprosjekt langs heile norskekysten
Administrerande direktør i Norled, Heidi Wolden, dro fram Vestfjorden som eit prosjekt som kan generere kompetanse og ressursar i industrien.
- Fleire sektorar i maritim næring kan ta del i endringane innanfor hydrogen i transport. Norled støttar regjeringa sitt krav om å bruke hydrogenferger på sambandet over Vestfjorden. Dette er eit ypparleg prosjekt som kan bidra til knoppskyting i næringa. Det er gunstig både for klima og norsk næringsliv, sa Wolden.
- Når vegkartet no blir teikna opp er Vestfjorden ein motor og kan være med på å byggje opp kompetanse og ressursar i industrien.
Administrerande direktør i Nel Hydrogen, Jon André Løkke, fortalte at det fins fleire gripeklare hydrogenprosjekt langs norskekysten og informerte om viktigheita av å utvikle fagarbeidarar, få på plass forretningsutvikling og skape arbeidsplassar.
- Dette er eit spennande område som er variert og knyt ulike industriar saman. For å oppnå vidare utvikling på feltet må vi bli inspirert av det som skjer i Europa og ha konkrete mål for bygging av infrastruktur, samt ei tydeleg ansvarsfordeling mellom stat og virkemiddelapparatet, fortalte Løkke.
Arne Werge-Olsen i ELKEM Bremanger kom med innspel på at det er viktig å skape ein marknad som gir lønsemd.
- Vi får ingen grøn omstilling om det bare er røde tal på botnlinja. Norge treng ei grøn industrisatsing, og næringslivet må ta ei aktiv rolle i satsinga. Vi må få på plass minst like gode vilkår som i resten av EU og gode støtteordningar er viktig.
Statsminister Erna Solberg avslutta møtet med å takke for mange gode innspel.
- Det er spennande å sjå så mange store og viktige aktørar. Vi må finne dei rette virkemidla, men òg finne fleire med langsiktig privat kapital og få desse med på prosjekta framover.
Utfordringa er å finne dei riktige knappane å trykke på.
Om du ynskjer å sende inn innspel til regjeringa sitt arbeid med vegkart for hydrogen kan du finne meir informasjon her. Frista for å kome med innspel er 10.desember.
Ta gjerne kontakt
Har du spørsmål eller kommentarar til denne saka? Ta gjerne kontakt.
