- Gledeleg å sjå nysgjerrigheita til jentene!

22. okt.

Jenter frå 9 klasse i Kinn kommune fekk eit innblikk i spennande teknologi- og realfagsyrke 22. oktober. Målet med dagen er å inspirere til eit mangfaldig arbeidsliv.

På vår «Jenter, teknologi og realfags-dag» blei dei 90 elevane møtt av 17 unge kvinner som fortalte om yrkesvalet sitt. Dei 17 kvinnene arbeider i yrke som i stor grad er mannsdominerte og målet var å inspirere jentene til å tenkje utanfor boksen når dei skal velje karriereveg.

Saka held fram under bildet.

Sarah Warloe, Supply Chain Manager i Elkem Bremanger møter elevane.

Opnar augene

Eit mangfaldig arbeidsliv kan bidra til innovasjon og verdiskaping, noko som er heilt nødvendig for å løyse morgondagens utfordringar. Nøkkelen til eit mangfalding arbeidsliv ligg mellom anna i valet av utdanning. 22. oktober fekk dei 90 jentene presentert eit stort utval av yrke - alt frå fiskehelsebiolog til tømrar, kranførar og prosjektleiar innan tang og taredyrking.

Dagen blei starta med korte presentasjonar av kvart yrke, etterfølgt av stands der elevane kunne teste ut ting i praksis og stille spørsmål til dei 17 rollemodellane. Kristin Svardal, prosjektleiar i den Florøbaserte hydrogenklynga Ocean Hyway Cluster, var ein av rollemodellane. Ho er imponert over interessa frå elevane:

Modellbilar som går på hydrogen var populært på standen til Kristin Svardal.

«For å løyse framtidas utfordringar er vi heilt avhengige av fleire teknologar. Skal vi få opp talet på teknologar og få dei beste hovudene og hendene, må vi rekruttere frå heile befolkninga. Og jentene må med! Det var gledeleg å sjå nysgjerrigheita til jentene eg møtte i dag. Eg trur at slike arrangement opnar auga for kor mange moglegheiter som finst innanfor realfagretta yrker».

Sjå fleire bilder frå arrangementet nedst i denne saka.

17 rollemodellar

Jenter og teknologi er eit årleg arrangement som Hub for Ocean gjennomfører i lag med Kinn Kommune og GCE Ocean Technology. Desse 17 rollemodellane møtte elevane:

Regine Johansen (Prosjektleiar digitalisering og innovasjon), SFE
Synnøve Åhjem (Fiskehelsebiolog), STIM
Ane-Sofie Domben Bareksten & Heidi Sundal (lærlingar elektromontør), Fokus Elektro
Sara Gjerland Høyesen & Hanna Bolette Myklebust (elevar TIP), Flora Vidaregåande skule
Linda Mortensen Midtbø (Hamnesjef), Florø hamn KF
Kristin Svardal (Prosjektleiar), Ocean Hyway Cluster
Alette Karstensen (Kranførar), ConocoPhillips
Lillian Nummedal Bryn (Tømrarlærling), HS Bygg AS
Bettina Wickmann Kvamme (Prosjektleiar), Akvahub
Guro Dregelid (Røyrleggjar), Florø Rør
Helene Aamot (Trainee INC Hydrogenteam) & Karen Sæten Nilsen (Markedskoordinator), INC Gruppen
Lisbeth Nordal (Bemanningskoordinator) & Martine Furnes Pettersen (Trainee teknisk avdeling), Fjord1
Sarah Warloe (Supply Chain Manager), Elkem Bremanger