Jenter og teknologi 2024
Den 28. november inviterte vi jenter i 9. klasse til inspirasjonsdagen «Jenter og teknologi». Formålet med dagen var å gi unge jenter eit innblikk i spanande karrieremoglegheiter innan teknologi- og realfagsyrke, og inspirere dei til å tenkje stort når dei skal velje vidaregåande utdanningsretning.
I år samla vi 84 jenter fra Florø og Eikefjord og 22 rollemodellar på kulturhuset i Florø til ein dag full av inspirasjon, læring og nysgjerrigheit. Gjennom dagen fekk deltakarane møte engasjerte og dyktige kvinnelege rollemodellar som anten studerer eller jobbar innan teknologi- og realfagsrelaterte felt. Rollemodellane delte sine erfaringar, gav råd og svara på spørsmål om alt frå studieval til korleis kvardagen ser ut i jobben eller utdanninga deira. Dette gav jentene ein unik sjanse til å stille spørsmål, få tips og høyre ekte historier om korleis det er å jobbe i teknologidrivne yrke.
Stemninga var avslappa, oppmuntrande og full av positiv energi. Det vart understreka at ingen spørsmål er for små eller rare – dette var jentene si arena for å utforske, stille spørsmål og bli inspirert. Gjennom interaktive aktivitetar, inspirerande presentasjonar og små gruppesamtalar fekk jentene moglegheita til å knyte kontakt med både rollemodellar og kvarandre.
9. klassejentene vart betre kjend med desse yrkene og personane:
Tømrar lærling, Valeria Ogarkova
Blikkenslager lærling, Oda Nilsen Halvorsen
Sivilingenør og IT konsulent, Marthe Sunde
Sivilingenør og leiar prosjekt konsern, Silje Mari Sunde
Arealplanleggjar, Christine Humlestøl Midtbø
Elektro rådgjevar, Hilde Ellingsen Nilsen
Fiskehelse- og berekraftsansvarleg, Silje Sveen
Lærar i teknologi- og industrifag, Camilla Landro
Montør, Heidi Sundal
Montør, Marion Hansen
Automatikar, opplæringskonsulent og leiar for jenter i Elektro SF, Lisa Marie Mo
IT utviklar, Anette Nilsen
HR rådgjevar, Regine Gausemel
Maskinførar, Camilla åsvoll
Teknisk leiar, Marita Jarstad
Logistikkforvaltar, Ingeborg Elise Vestby
Anbodsansvarleg, Sigrid Sellereite
Energimontør lærling, Anna Endestad
Tømrar lærling, Kristin Larsen Svånå
Jenter og Teknologi har som mål å vise at teknologi og realfag er framtidsretta og spanande fagområde som opnar dørene til varierte, kreative og meiningsfulle karrierar. Vi ønskjer å utfordre stereotypiar og bidra til at fleire jenter ser moglegheitene som ligg i desse yrka. Ved å løfte fram positive rollemodellar og konkrete karrierevegar håpar vi å motivere fleire til å velje realfag når dei skal søkje vidaregåande skule.
Arrangementet er eit samarbeid mellom Hub for Ocean og Kinn kommune, med verdifull støtte frå Flora Industri- og Næringsforeining (FIN). Vi er utruleg stolte over å ha fått gjennomført denne dagen og ser fram til å inspirere endå fleire unge jenter til å satse på teknologi og realfag i framtida. Tusen takk til alle som deltok og bidrog til å gjere dagen minneverdig!
